Moda jasangarria oinarri
Marka: Katalin Antxia / Modu bat tailerra
Ehun-kreazioa orokorrean lantzen du Katalin Antxiak, baina ñabardura nabarmen batekin: Modu Bat tailerraren oinarria moda jasangarria da. Aretxabaletarrak Saran du tailerra 2019a ezkero. Bertan, Modu Bat markako arropa saltzeaz gain, arropa neurrira egin eta egokitzen du eta ikastaroak eskaintzen ditu.
Gizartearekiko konpromisoa
Katalin Antxiaren ustez, “diseinatzaile garaikide baten lana gizartean dauden arazoei eskua emanda diseinatzea da”. Gaur egungo diseinatzaileen “aktibismo hori” oso garrantzitsua dela uste du eta bide horretan “diseinatzailearen zeregina arduraz betetzen” saiatzen dela dio. Hori horrela, moda osasuntsua, jasangarria eta ingurumenarekiko konprometitua egitea da haren helburua.
Eta oinarri horretan sostengatzen da Modu Bat proiektua: “Plastikoa, zaborra, baliabide berriztagarrien ustiapena… Horri guztiari begira diseinatzea eta mundu honek onartu ahal duen produktua ateratzea da proiektuaren funtsa”. Hala, material natural bakarreko diseinuak egiten ditu (%100 kotoi, %100 artile…). “Askoz iraunkorragoak dira eta produktuaren bizia amaitzean, birziklagarriak. Gainera, naturalak izatera, osasuntsuagoak dira eta gure gorputza askoz gehiago errespetatzen dute”, azaldu du.
Generorik ez
Estetikari dagokionez, diseinuak bezeroa errespeta dezan saiatzen da: “Ikusita zenbat arazo psikologiko dagoen, generorik gabeko jantziak egiten ditut”. Bestetik, arropa bezeroaren neurrira moldatzen du: “Guztiok behar dugu patroi industriala gure neurrietara ekarri”. Era horretara bezeroak jantzi horrekiko “apreziazio berezia” izango duela dio, “diseinuan parte hartu duelako edo diseinu hori harentzat moldatua izan delako”. Azkenik, bezeroen jantziak konpondu eta moldatu egiten ditu: “Janzteaz aspertu garen arropa hori, itxuraldatuta, berriz erabiltzeko”.
Moda-laborategia
Modu Bat tailerra “moda-laborategia” da Antxiarentzat, nahiz eta etorkizunean “soilik Modu Bat markapeko arropa” egin nahiko lukeen. Haatik, horra iristeko “oraindik bezeroengandik informazio gehiago batu” nahi du, eta, haren alderdi hori asetzeko, besteak beste, ikastaroak ematen ditu astero, baita formakuntza-saioak ere.
