Deserrite taldea

Rock eta punk doinuekin jositako Deserrite izeneko lehenengo lana aurkeztu du Sakanako Deserrite taldeak

Nortzuek osatzen duzue Deserrite?
Sakanako taldea gara eta Palop (ahotsa), Iñaki (gitarra), Luken (baxua), Gaizka (gitarra) eta Hodei (Bateria) gara taldekideak.

Zein musika mota jorratzen duzue?
Gurea rock-and-roll musika da, baina punk-rockaren eragina nabaria da. Riffak eta doinu melodikoak oinarri gogorrarekin nahasten ditugu, batez ere.

Zuen lehen diskoa kalean da; zer dakar?
Edozein talderen lehen lanean bezala, lanordu asko eta esfortzu handia dakar. Modu batean disko honek Deserritera ongietorria egiteaz gain, abesti bakoitzean gure ikuspegitik ikusitako munduaren argazki bat aurkezten da.

Zeintzuk dira zuen erreferenteak?
Bakoitzak bere erreferenteak ekartzen ditu etxetik eta nahasketa horrek emaitza polita ematen du, baina egia da denon etxean Barricada, Social Distorsion, AC/DC, Berri Txarrak, Guns n’ Roses… entzun direla. Beste erreferente komun bat eta oso gertukoa dena Los del Rayo taldea da.

Kontzerturik baduzue agendan?
Urtarrilaren 27an Olatzagutiko gaztetxean aurkeztu genuen gure lana kontzertu eder batekin. Beste emanaldi batzuk ixtekotan gaude eta laster emango dugu horien berri gure sare sozialetan. Adi egon, beraz!